Bert Maddawat’s Testimony in Keley-i
Yan eman ni neni-yanan kun Philippines ni linawwan kud Australia eman ni negibbuhan ni dedication ni Keley-i New Testament ni 1980 ey nebibbilang ida hu kamengullug di Asipulo. Et heni etan ni el-eleg hu nakka pengikgikna ni nunman. Nem yan eman ni neitenu-tu-nud ni mi nambihibihitaan ey nakka metngan dakel ni nekenapkapya.
Dimaddakkel ida hu kamengullug, wadadda nangkebehwat ni simbaan, wadadda kameemmuemmung ni kamengeddaeddal ni Neitudek ni Hapit Apu Dios niya waddadda kaungaunga ni kameemmung ni linggu di simbaan ni man-eddal ni meipppanggep Apu Dios. Wadadda dama mabeki ni kamekillakillaw di simbaan niya ida kamekiammuamung idan kamengullug.
Yadda etan dakel ni elaw tayun baki niya kapengibbekkibekkiin kaippakni niya kaimmegmegi ey kamangkesikked. Yadda tenul ni ganha, et yadda etan
kameippahding di baki, niyadda etan tayaw di baki , ey nambalin ida law ni panlaglagsakan di hipan kakeemmuemmungi di ay-ayam weno hipan pan-an-anlaan. Yadda etan tenebbatebbal, benalbaltung, ena-allim, niya penallapallat di baki ey nehullulan idan dasal niya a-appeh ni pengidaydayaw nan Apu Dios.
Yan pinhakkey eman ni kadan Easter Service di simbaan di Duyo, ey inaygan da-ak ni um-idwat ni ansikkuy ni hapit. Nakka umlelwa ni nenang-angan kuddan hantapug ni tuun nangkeamung di bawang niyad dallin ni simbaan. Yadda etan dakel ni neipenahding, meippalpu eman ni neni-yanan kun bebley mid Asipulo, ey alig tu heni miracle ida humman niya kaum-idwat ida humman ni kaamlengi.
Nem emin ida humman ni nekenapkaya ey neipahding ida gapu tep ya planuh Apu Dios ni hi-gatsun emin ni tuu. Et humman hu wadadda hu intenu-dak tud kebebbebley ni kandan missionaries e humman ida etan kamengullug Apu Dios ni kaanmengippeamtan meippanggep Apu Dios di edum ni bebely e henid Mr. Richard nan Mrs. Lou Hohulin. Immalidda et nebayag ni nekibebley idan hi-gatusun nemaddang ni hi-gatsu et ibelin da Hapit Apu Dios di hapit tayu et ay mabalin law ni ewwatan tayudda edum ni pinhed Apu Dios ni e-helen di neitudek ni hapit tu.
Hedin hi-gak ngu, man nakka mansalamat Apu Dios di meippanggep ni ingkatuuk ni nunya niya hipan ikkatuuk alin hakey aggew. Nakka ibbilang e hi Apu ey hi-gatu nengituntun ni hipan ingkattuuk tep yadda etan tuka ittu-dak ni kandan missionaries hu nengitudun pehding kud meippapnggep ni biyag ni kamengullug Apu Dios. Ya lallapputu ey ya etan kandan Catholic Mission hu alig tu nengilepun nemappeg ni nakka pengu-unnudin elaw idan ammed kud meippanggep ni baki ni nunman la. Hi ama ey hi-gatu hu hakey ni mabekid bebley mi.
Ya Catholic Mission hu nemangulun nengitudun meippanggep ni elaw Apu Dios niya hi-gada bimmaddang et gibbuhen ku hu high school. Gullat ni eleg da-ak baddangan et wadan nena-yunnak di nambebleyan mi et wadan nambalinnak na-mun mabeki e henin lan ama.
Nem beken ni ya humman pappeg ni baddang Apu Dios ni hi-gak tep entani ey heni tuwwak inaygan ni umbaddang idan hakey mewan ni immalin missionaries ni kandan Wycliffe Bible Translators. Immalid Mr. Richard nan Mrs. Lou Hohulin et makingungngunnu-ak ni hi-gadan pigan toon di meippanggep ni mengibbellin ni Hapit Apu Dios di hapit mi.
Ya nekingungngunnuan kud mengibbellin ni hapit Apu Dios di hapit mi hu nengipa-let ni hi-gak di elaw ni biyag ni kamengullug ni nengadalan kun kabalinan ni hapit Apu Dios di meippanggep ni impeminhed, et ya elaw ni pemessinsah, niya ya makulug ni kapengu-unnudin Hi-gatu.
Hi ama ey netey eman ni 1995, nem diddingngel ku e hin-addum ni kamekikkillaw di service di simbaan niya kamekiammammung idan kamengullug. Et ya ngu hu kangku ey ngenamung hi Apu Dios di meippanggep ni biyag nan hi ama.
Ya impeminhed niya kapemessinsah nan Apu Dios ey neipeang-ang eman ni linawwan middan pamilyah kudya Australia, pasidda etan epat ni inap-apuk ida, ni nengipahdingan dan kandan udidih ni henga nan ina di Antipolo.
Pinesinsahan Apu Dios hi ina di tuka pengakkahingin nunman la ni meippanggpep ni pengullugan ni Apu Dios. Impatnak ni inhel ni hi-gada hu menippapnggep ni kakinayyaggud ni biyag ni pengullugan ni Apu Dios et hannak hi-yana hu bebley mid Antipolo ni inlian kudya Australia. Nem ya daka ihhumang ey kanday humman kunu ngun elaw da hu imbangun da et anin ni humman kunu hu u-unnuden da ingganah mettey ida.
Nem yan eman ni October 2014 ni nengippahdingan dan henga ni biyag nan ina ey natnga kami tep tuka ibbaga etan pastor idan kamengullug ni nemenyag ni hi-gatu et hi-gatu kunu hu mengipappangngulun mengippu-ut ni meippangep ni nunman e Henga et beken ni ya mabeki.
Hi ahwak, e hi Jenelle, et yadda etan pamilyah midya Australia ni nekilaw, passidda etan inap-apu mi, ey kami kaumlelwa ni mika penang-ang-angngin kapan-an-anlain ina ni daka pengi-ena-appehin a-appeh ni kapandaydayaw ni Apu Dios ni kamelingngalingngaw di bawang ni baley etan ni udidyan kun laki. Endi hu kamammadmad di baki, endi hu kamambeggel niya endi kamambaltung. Wadadda etan nampandasal niya wadadda dama edum ni impadngel da hu meippangep ni kapehpehding Apu Dios di biyag da. Hi Apu Dios ey makulug ni kabaelan tun pambalin ni kayyaggud hu lawah ni elaw di biyag ni tuu et naneng tun humman hu tuka pehpeding di bebley ni nalpuan ku.
Ya hakey mewan ni heni malkan Apu Dios di biyag ku ey ya tu nengiebulutan etan ni biin kamengullug ni inahwak. Hi ahwak ey hi-gatu law hu kamangngunnun pambiyagan ni pamilyah mi.
Neligat ni meewwatan hu inna-nu tun ya etan hakey ni tuun nalpud nekawwetwet ida ammed tu ey an mabalin ni an limmaw ni an nekibebley di edum ni bebley.
Nem hi Apu Dios dedan ey inamta tun emin hu hipan mekapkapya et inamta tu e hakey alin aggew et dammutun umbaddangngak ali mewan di Hohulin ni pengibbellinan da etan ni English Old Testament di Keley-i et heni tu intu-dak etan hakey ni kat-agun biidya Australia ni volunteer di SIL mission di Philippines et mandammu kami.
Nelabah hu tellun toon ey nan-ahwa kami et mambebley kamidya Australia. Limmaw di nehuluk ni dewwan pulun toon hu nelabah ey tu-wangun heni tuwwak ineyagan mewan Apu Dios ni umbaddang di Hohulin ni pengibbellinan dan etan ni kandan Old Testament di hapit min Keley-i.
Entanni ey beken law ni kahapulan etan ngunud nakka pangngunnui et man-ekallak di ngunuk et nakka umhamahamak ni hipan pehding kud biyag ku. Kenkenayun ni nunman ey mika dewwata etan kandan News letter di Hohulin ey wada binidbid min mahapul da hu baddang ni mengibbellin etan ni kandan Old Testament.
Et umenung-ungbal kamin ahwak ey nandagyum hu nemnem mi e umbaddangngak di Hohulin. Et taliponohan middad America et peamta min hi-gada e dammutun umbaddangngak mewan. Neipalpun nunman ni nengilepuan kun umbaddang ey hi law ahwak hu kamangngunnun pambiyagan mi ingganah ni nunya.
Wadad Hohulin di America ni nunman ey wada-ak di deya Australia, niya wadaddad Philippines etan edum min bimmenaddang ni mengibbellin etan ni Old Testament.
Nem gapu tep ya etan kandan “modern Technology”, mabalin ni neippahding humman ni ingngunnun nginunu mi. Immabut di hampulun toon ey negibbuh hu revision etan ni New Testament niya negibbuh ni neibelin etan Old Testament di Keley-i et mangkahhakey law ni hakey ni libluh et maidedicate nan Apu Dios eman ni 2009.
Humman ni neidedicatan ni Antipolo, Ifugao Bible ey eteng hu amleng min ahwak, pasidda etan edum min iAustralia ni limmaw ni nekiemung di hanniman ni importanteh ni kameippahding. Niya eteng amleng mi daman nenammud
Hohulin niyadda etan edum ni bimmaddang di neibelinan ni nunman e Antipolo, Ifugao Bible.
Eteng amleng kun nenang-angan kuddan emin ni hi-gada tep eleg ku enang-angen ida mewan meippalpu eman ni nanggillig ni Bible workshop mid Philippines ni 2001.
Hi Apu Dios ey makulug ni kabaelan tun emin tep emin etan eleg kabalinin tuun ippahding ey tuka pambalin ni kameippahding.
Ya manggillig ni e-ehelen ku, ey eteng nakka pansalamatin Apu Dios panggep ni ahwak tep naneng tun hi-gatun ebuh hu kamangngungngunnun pambiyagan mi et dammutun bimmenaddangngak di Hohulin di neibelinan ni English ni Hapit Apu Dios di Keley-i e hapit mi. Tuwwak dama kaigga-gan mengitultuluy ni volunteer service kud edum kuddan tuud Antipolo et nak mewan kababbaddangid Hohulin di daka pampengapyain kandan English-Keley-i dictionary. Hakey aggew et wadan huyyan dictionary ey umbaddang ida etan ni tuun pinhed dan amtaen hu keibbellinan ni English di Keley-i wenu keibbellinan ni Keley-i di English.
Meidaydayaw hi Apu Dios tep eteng hu baddang tun hi-gak di impenahding kud biyag ku nema-mad meippanggep di advancement ni nan-ap-apuan tu niya keihhinnapan ni meippanggep ni impeminhed tuddan edum kun tuud Ifugao ni impeamtan etan ni U-ungnga tun hi Jesus Christo e Apu tayu niya kaumhelaknib ni hi-gatsu!
